قول يا عم "جمال" وقول دين أبوهم اسمه إيه؟
اللي عرى لحم ست ف وسط شارع واللي جاب العيب عليها بدم ساقع دين أبوه يبقى اسمه إيه؟
اللي داس على صدرها وبجزمة ميري اللي ولع نار ف قلبي وف ضميري دين أبوه يبقى اسمه إيه؟
اللي خضب بالدماء لحية عماد وقبله مينا اللي قال إنه حامينا واتقلب واندار علينا دين أبوه يبقى اسمه إيه؟
اللي يسحل ست في عمر الجـدود واللي يحرس الكراسي ويسيب الحدود دين أبوه يبقى اسمه إيه؟
اللي صايد بالرصاص ورود بلادي واللي يدبحني بمراري وييتم ولادي دين أبوه يبقى اسمه إيه؟
اللي فاكر إنه شاطر لما يطفي نور عنينا واللي فاكر إنه راجل لما بيترتر علينا دين أبوه يبقى اسمه إيه؟
واللي مديله أوامر .. واللي بيعرص عليه واللي بيدافع بحرقة .. عن رباط بيادة البيه دين أبوه يبقى اسمه إيه؟
والزبالة واللمامة اللي مدعية الشهامة اللي رابطين فوطة صفرا ع الكرامة دين أبوهم اسمه إيه؟
والذئاب اللي واخدة الدين حجاب ازي حالهم بعدما هتكوا النقاب؟ دين أبوهم اتداري ليه؟
واللي عاشقين عمود الخيمة وقاعدين عليه كل ما تحصل مصيبة يسألونا: بتموتوا ليه؟ دين أبوهم شكله إيه؟
*** دين أبوهم على كل حال مش زي ديني
ديني دينك يا حسين يا ولد طه ديني دين العقل مش دين البلاهة ديني دين النخوة مش دين البلادة
ديني بيقول: الجهاد راس العبادة ديني يهرب من الهوان بحصان شهادة ودين أبوهم حط راسهم م الهوان تحت البيادة
ديني فيه الرب واحد دين أبوهم دين عبيد بألف سيد قول يا عم جمال وعيد دين أبوهم .... اسمه إيه؟
إياد حرفوش - القاهرة في الليلة السودة دي
ليست هناك تعليقات:
إرسال تعليق